RESPONDEO dicendum,  quòd aliquis damnatur ad mortem  dupliciter. Vno modo iustè: & sic  non licet condemnato se defendere. Licitum enim est iudici eum resistentem impugnare. Vnde relinquitur, quòd ex parte eius sit bellum iniustum. Vnde indubitanter  peccat. Alio modo condemnatur  aliquis iniustè, & tale iudicium simile est violentiæ latronum: secundum illud Ezechielis 22. Principes  eius in medio illius quasi lupi rapientes prædam, ad effundendum  sanguinem. Et ideo sicut licet resistere latronibus: ita licet resistere  in tali casu malis principibus, nisi  fortè propter scandalum vitandum,  cùm ex hoc aliqua grauis turbatio  timeretur.