Secunda regula est, communis æstimatio fori & bonorum hominum. ¶ Tertia  regula est, conuentio inter emptorem &   venditorem ipsum. Quod autem istæ regulæ sint sufficienter enumeratæ. Probatur, quia pretium iustum non est ab ipsa  natura determinatum: etenim iustum naturale, autore Aristot. 5. Ethicorum cap. 7.   est idem apud omnes, at vero pretium rerum multipliciter variatur pro temporis &   loci varietate, & etiam pro ipsarum rerum  varietate: ergo necesse est, quòd pretium  determinetur per beneplacitum hominum:    non potest autem excogitari aliquod aliud  beneplacitum per quod constituatur istud  iustum pretium, quod non contineatur in  prædictis: ergo sufficienter enumeratæ sunt  istæ tres regulæ.