Infirmi in quibus corporis partibus vngendi.
  
  ¶ QVÆritur, in quibus partibus est  vngendus infirmus? Videtur quod in omnibus, quia significat hoc sacramentum   perfectam animæ curationem, ergo  debet vngi in toto corpore: quia anima est in qualibet parte corporis. Respondeo, quod in medicationibus corporalibus applicantur medicinæ  non omnibus partibus quæ dolent, sed vbi est  radix morbi. Et quia tres sunt radices  morbi spiritualis: videlicet ratio dirigens, appetitus mouens &  prosequens,  & principia rationis per quæ intelligit, sunt sensus (nihil enim in intellectu quin prius fuerit in sensu) ideó vnguntur omnes sensus. Principium verò mouens appetitum est dilectio: vnde vnguntur renes vbi viget dilectio. Foeminæ verò propter honestatem, nec  in renibus, nec in ventre sunt vngendæ.   Pedes verò vnguntur quia sunt prosecutiui & executiuè se habent. Vnctio   quidem in sensibus est de essentia, non  autem vnctio in renibus. Quia principium   dirigens est principium  omnium aliorum.  Et ideò in aliquibus partibus non  vnguntur: & melius esset quòd non esset in  vsu. At mutilati vnguntur in partibus  proximis. Et etiam ceci à natiuitate sunt  in oculis vngendi. Quia tales possent  per aliquas sensationes desiderare videre mulieres.