Suis frugibus indigent, aliena furatum eunt, & vicinorum flores decerpunt, scilicèt vt eos flores carduis suis misceant. Ad eundem modum, qui natiuæ eloquentiæ steriles sunt, centones consarcinant, qui suos semper prodant dominos, versicolores nempè, & nullibi similes. Hoc modo & psittacus, & coruus, humanam edunt loquelam, & si elegantior Magister accedat, maximè excultam. Tu verò extempore, & vt res postulat, siue quid deliberandum, siue decernendum, siue decreto imperandum, orationem in Senatu habes, concinnam, disertam, appositissimam. Video quantum arti præstet natura, quàm longè item emineant, si ritè iungantur.