# 37
Ac ob negligentiam ipsorum aliquid sanguinis stillauit in terra & in altari. 
 
 Capvt xxxvii. 
 
POena huius excessus ponitur in cap. Si per negligentiam. de conse. distinct. ij. per haec verba, Si per negligentiam aliquid de sanguine stillauerit in terram, lingua lambatur, tabula radetur, si non fuerit tabula, vt non conculcetur, locus, conradetur, & igne consumetur, & cinis intra altare condatur, & sacerdos xl. diebus poeniteat, si super altare stillauerit calix, sorbeat minister stillam, & tribus diebus poeniteat. Si super lintheum altaris & ad aliud stilla peruenerit, iiij. diebus poeniteat, si vsque ad tertium, ix. diebus, si vsque ad quartum, xx. diebus poeniteat: & lintheamina quae tetigerit stilla tribus vicibus minister abluat calice supposito, & aqua absolutionis sumatur, & iuxta altare recondatur. Quae poena cum sit canonis antiqui, & que magis videtur poenitentiae foro, quam iudiciali prouidere, si casus occurrerit, & in iudicium deducatur, tunc iudex attenta facti qualitate & astantis populi noticia vel scandalo, & sacerdotis culpa vel negligentia poena moderabitur vel augebitur, prout aequius sibi visum fuerit.